Хүнс, хөдөө аж ахуйн яам, Мал эмнэлгийн ерөнхий газар, Монголын махны холбоо, Аргалант сумын Засаг даргын Тамгын газрын дэмжлэгээр “Хөдөө аж ахуйн бирж” ТӨХХК өнөөдөр амьд малын төвлөрсөн арилжааг зохион байгуулж байна. 

Эмээлт төвөөс 10 км-т байрлах “Ложистикийн төв”-д энэхүү арилжаа үргэлжилж байна. 

Дундын зуучлалгүйгээр малчин, үйлдвэрийг холбосон дээрх арилжаанд оролцсоноор үйлдвэр, аж ахуйн нэгжүүдэд гарал үүсэл тодорхой, эрүүл ахуйн стандартыг хангасан малыг худалдан авах, цуглуулалтын болон тээврийн зардал хэмнэх давуу талтай. Харин малчинд чанарт суурилсан зах зээлийн бодит үнээр малаа арилжих, төлбөр тооцоог эрсдэлгүй түргэн шуурхай гүйцэтгэн, нийлүүлэх, аж ахуй нэгжүүдтэй хамтран ажиллах боломж нээгдэж байна гэж албаныхан үзэж байна. 

Амьд малын төвлөрсөн арилжааны үеэр малчдын хүсэлтээр малын тэжээлийн худалдаа зохион байгуулагдах юм.