Пакистан улсын Ардчилсан намын явуулсан судалгаагаар иргэдийн олонх нь авлигын хэрэгт цаазын ял оноохыг дэмжсэн байна. Тус  намаас хийсэн мэдэгдэлд “Тус судалгаанд тухайн улсад оршин суугаа болон хилийн чинадад ажиллаж, амьдарч байгаа нийт 100.000 гаруй иргэнийг хамруулсан ба авлигын хэрэгт холбогдсон этгээдэд ямар ял оноох талаар, хорих ял, эсхүл цаазаар авах ял оноох нь зөв үү гэсэн асуулга байсан юм. Судалгаанд оролцсон олонх иргэн авлигын хэрэгт холбогдсон этгээдүүдийн хэргийг маш чанга шалгаж, хатуу ял шийтгэл оноож шийтгэх ёстой. Авлигын бүх хэргийг цэргийн шүүхээр шийтгэж, авлигыг ор мөргүй устгах ёстой гэсэн байр суурийг илэрхийлсэн” гэжээ.

Судалгаанд оролцогсдын 92 хувь нь авлигын хэрэгт холбогдсон этгээдийг цаазаар авахыг дэмжсэн бол 8 хувь нь тус улсад ядуурал, ажилгүйдэл устаж, тус улсын гадаад өрийг төлөх хангалттай хөрөнгөтэй болтол насаар нь шоронд хорих нь зүйтэй гэж үзсэн байна.

Мөн авлигач улс төрчид болон төрийн албан хаагчдын хөрөнгийн эх үүсвэрийг тодруулахын тулд сайтар шалгаж, тансаг хаус, үнэтэй машинаа хаанаас хэрхэн бий болгосныг үнэн зөвөөр олж тогтоон, тэдний хэргийг энгийн шүүхээс илүү цэргийн шүүхээр тусгайлан шүүх хэрэгтэй гэжээ.

Эх сурвалж: thenews.com