Зүүн Азийн Олимпын Хороодын Холбоо (EAOC)-ны санаачилгаар Сычуань мужийн Спортын хороо, БНХАУ-ын Бадминтоны холбоотой хамтран зохион байгуулж буй өсвөрийн тамирчдын олон улсын бэлтгэл цугларалт БНХАУ-ын Чэндү хотод эхэллээ.

2026 оны долоодугаар сарын 19-25-ны өдрүүдэд үргэлжлэх энэхүү цугларалтад Монгол Улсыг төлөөлөн өсвөр үеийн дөрвөн удаагийн улсын аварга, Хүүхдийн спортын наадмын гурван удаагийн аварга Ү.Өсөх-Ирээдүй, 2026 оны насанд хүрэгчдийн улсын аварга, 2025 оны Хүүхдийн спортын наадмын аварга Ц.Энхлэн болон дасгалжуулагч, спортын мастер Б.Хувьтөгөлдөр нар оролцож байна.

Бэлтгэл сургуулилтыг БНХАУ-ын өсвөрийн эрэгтэй шигшээ багийн ахлах дасгалжуулагч асан Ван Юэпин удирдан явуулж байгаа бол туслах ахлах дасгалжуулагчаар өндөр зэрэглэлийн дасгалжуулагч Жан Шаочэнь, дасгалжуулагчаар БНХАУ-ын Сычуань мужийн бадминтоны шигшээ багийн дасгалжуулагч Хэ Пан ажиллаж байна.

Уг хөтөлбөр нь Зүүн Азийн бүс нутгийн спортын хөгжлийг дэмжих, залуу тамирчид, дасгалжуулагчдын ур чадварыг дээшлүүлэх, харилцан туршлага солилцох, цаашлаад тив, дэлхийн болон олимпын түвшний тамирчдыг бэлтгэх зорилготой юм.

EAOC энэхүү олон улсын бэлтгэл цугларалтыг өмнөх жилүүдэд ширээний теннисний төрлөөр амжилттай зохион байгуулж ирсэн бөгөөд энэ жил анх удаа бадминтоны төрлийг хөтөлбөртөө багтаан зохион байгуулж буйгаараа онцлог болж байна.