Монгол Улсын Ерөнхийлөгч У.Хүрэлсүхийн ивээл дор “ABU РОБОКОН 2025 ULAANBAATAR” Олон улсын тэмцээн АСА АРЕНА цогцолборт өнөөдөр 10 цагаас хэсгийн тоглолтоор эхэлнэ.

Тус тэмцээнд Энэтхэг, Индонез, Япон, Малайз, Монгол, Непал, Шри Ланка, Тайланд, Вьетнам, Камбож, Египтет, Фижи улсын болон БНХАУ-ын засаг захиргааны онцгой бүс Хонгконгийн багууд оролцож байгаа. Тэмцээний шүүгчийн зөвлөлд Монгол, Япон, Вьетнам, Хонконгийн нийт 5 шүүгч байх бол талбайн шүүгчээр Монгол, Япон, Хонконгийн нийт 10 шүүгч ажиллана.

Энэ удаад манай улсаас ШУТИС-ийн Мэдээлэл холбоо технологийн сургуулийн “Түвшин Электроникс”, “HICH TECH” багууд оролцож байна.

Тэмцээний хэсгийн тогтолтын А бүсэд Вьетнам, Монгол, Хонгконгийн багууд, В бүсэд Камбож, Монгол, Непалын багууд, С хэсэгт Япон, Малайз, Шри-Ланка улсын багууд, D хэсэгт Индонез, Энэтхэг, Фижи улсын багууд, Е хэсэгт Тайланд, Египетийн багууд тус тус өрсөлдөнө.

Дашрамд Монгол залуусаа дэмжин уухайлах үзэгч олонд энэ удаагийн тэмцээн үүд хаалгаа үнэ төлбөргүй нээсэн гэдгийг сонордуулахад таатай байна. Та бүхэн гэр бүлээрээ хүрэлцэн ирж, эх орныхоо багуудыг дэмжээрэй.