АНУ-ын Засаг захиргаа холбооны оюутны зээлийн тогтолцоонд нэмэлт өөрчлөлт оруулж байгаагаа мэдэгдлээ. Тухайлбал, зээл төлсөн хугацаа болон зээлийн хэмжээнээс хамаарч тэглэх, төлөх жилийг багасгах, гэр бүлийн орлого, гишүүдийн тооноос хамаарч, сар бүрийн төлөлтийг шинэчилж бууруулах зэрэг өөрчлөлт орсноор Америкийн сая сая оюутны сургалтын төлбөрийн зээлийг тэглэх боломж бүрдэж байгаа юм байна.

АНУ-ын Боловсролын яам оюутны зээлийн дарамтыг хөнгөвчлөх нөгөө талдаа сая сая Америкчуудын санхүүгийн асуудлыг шийдвэрлэхэд томоохон түлхэц өгнө гэж харж байна. Энэ хүрээнд 40 мянган зээлдэгчийн зээлийг тэглэж байгаагаас гадна 3,6 сая зээлдэгч төлбөрөө барагдуулахад 2-3 жил ойртож байгаа юм байна. Өнөөдрийн байдлаар Америкийн 43 сая иргэн сургалтын төлбөрийн зээлд хамрагджээ. Энэ нь мөнгөн дүнгээр тооцвол 1,6 их наяд америк доллар болж байна.

Оюутны зээл нь Америкийн хэрэглэгчдийн хувьд, орон сууцны зээлийн дараа хоёрдугаарт ордог бөгөөд тухайн айл өрх сургалтын төлбөрийн зээлийг төлөхөд дунджаар 20 жил болдог юм байна. Өнгөрсөн онд Цагаан ордны Тэргүүн хөгжлийн бэрхшээлтэй 300 гаруй мянган оюутны сургалтын зээл болох 5,8 тэрбум америк долларын өрийг тэглэж байсан. Үүний зэрэгцээ бусад оюутны зээлийг цар тахлын нөхцөл байдал болон инфляц өссөн зэрэг зах зээлийн нөхцөл байдалтай уялдуулан, зээлийн эргэн төлөлтийг 2022 оны 8 дугаар сарын 31-нийг хүртэл хойшлуулжээ.