Газрын тос экспортлогч орнуудын байгууллага буюу ОПЕК болон гишүүн бус орнууд, цахимаар хуралдаж, ирэх сарын олборлолтын хэмжээг хэлэлцлээ. Ирэх 4 дүгээр сараас газрын тос олборлолтын хэмжээг нэг өдөрт 400 мянган баррелиар нэмэгдүүлэхээр шийдвэрлэжээ. Олон улсад газрын тосны ханш огцом өсч байгаа боловч ОПЕК-ын орнууд, газрын тосны олборлолтоо аажмаар нэмэгдүүлэх бодлогоо цаашид ч хэвээр хадгална гэж үзэж байна.

Тодруулбал, түүхий эдийн зах зээлийн өнөөгийн тогтворгүй байдал нь суурь үзүүлэлтийн өөрчлөлтөөс илүүтэй геополитикийн нөхцөл байдалтай холбоотой гэж гишүүн орнууд үзэж байгаа юм. Өөрөөр хэлбэл, одоогийн зах зээлийн тогтворгүй байдлыг богино хугацаанд үргэлжилнэ. Том зураглалаар нь харвал зах зээлд нийлүүлэлтийн хомстол үүсээгүй гэж үзэж бодлогоо хэвээр үргэлжлүүлэх аж.

Мөн, одоогийн газрын тосны зах зээлийн нөхцөл байдал, цаашлаад хэтийн төлөв байдлаас харахад, эрэлт нийлүүлэлт нь тэнцвэртэй, үнийн өсөлт ч гэсэн богино хугацаанд хэлбэлзэх төлөвтэй  байгааг харуулж байна. ОПЕК-ийн уулзалтын өмнө, олон улсын эрчим хүчний агентлагийн гишүүн орнууд мягмар гарагт цахимаар хуралдаж, олон улсын нөхцөл байдлаас шалтгаалан газрын тосны зах зээлийн үнэ ханшийг тогтворжуулах,  эрчим хүчний зах зээл дэх тасалдлыг нөхөхийн тулд нөөцөөсөө нийт 60 сая баррель гаргахаар шийдвэрлэснээ зарласан.

Үүний 30 саяыг АНУ-ын стратегийн газрын тосны нөөцөөс бүрдүүлэх бол үлдсэн 30 сая баррелийг бусад гишүүн орон нөөц боломжид тулгуурлан шийдвэрлэхээр тохиролцсон. Харин шинжээчид үүнийг газрын тосны үнийн өсөлтийг хязгаарлан барьж, нэг түвшинд балгахад тийм ч үр дүнтэй арга хэмжээ гэж үзэхгүй байна. ОПЕК-ын гишүүн орнууд, 2022 онд, дэлхийн газрын тосны эрэлт нэмэгдэж, нэг өдөрт олборлох газрын тосны хэмжээ 4,2 сая баррель болж өснө гэж тооцоолжээ.