Европын холбооны орнууд Беларусь улсыг олон тооны цагаачдыг хил орчмын бүс нутагтаа гацаасан, хүний эрхийн асуудал ноцтой зөрчиж байна гэдэг үндэслэлээр тус улсын эсрэг хориг арга хэмжээ тогтоохоор тохиролцлоо. Энэ тухай Европын холбооны Гадаад бодлогын тэргүүний мэдэгдэж байгаагаар одоогоор Беларусьт тогтоох хориг арга хэмжээний талаар нарийн мэдээлэл эцсийн байдлаар гараагүй, цагаачдыг аялахад нь тусалсан агаарын тээврийн компаниуд болон аялал жуулчлалын агентлагуудыг хориг арга хэмжээнд оруулах саналтай байгаагаа мэдэгдсэн байна.

Мөн Европын холбооны гишүүн орны удирдагчид, хил дээр гацсан олон мянган цагаачийг эх оронд нь хэрхэн аюулгүй буцаах вэ гэдэг асуудлыг НҮБ болон, түүний салбар байгууллагуудтай хэлэлцэхээр төлөвлөж байгаа юм байна.

Олон улсын ажиглагчдын хувьд Европын холбооны энэ шийдвэрийг тийм ч зөв зүйтэй шийдвэр гэж хүлээн авахгүй байна. Учир нь шинээр хориг тогтоосноор байгалийн хий, газрын тосны үнэ өсч болзошгүй, цаашлаад эрчим хүчний үнэ өндөр, эрэлт нийлүүлэлтээ хангаж чадахгүй байгаа энэ цаг үед Европын орнуудад нүүрлээд байгаа хямрал улам гүнзгийрнэ гэж үзэж байна. Өчигдөр Беларусийн Төрийн тэргүүн “Хэрвээ манай улсад шинэ хориг арга хэмжээ тогтоовол, Ямал-Европын байгалийн хийн хоолойгоор нийлүүлэх хийн урсгалыг хаана” гэж мэдэгдсэн байна. Ямал-Европ байгалийн хийн хоолой нь ОХУ-аас Беларусийн газар нутгаар дамжуулан Европын орнуудад хий нийлүүлдэг хоолой юм. Өнгөрсөн 8 дугаар сараас хойш Беларусиас хууль бусаар хил давах гэсэн цагаачдын урсгал нэмэгдсээр одоогийн байдлаар Польш Беларусийн хил дээр 2000 гаруй цагаач, дүрвэгч цуглаад байна. Эдгээр цагаачдын ихэнх нь Ойрх Дорнод болон Азийн цагаачид юм.