Цар тахлын улмаас 600 гаруй хоногийн турш хилээ хаасан Австрали улс хязгаарлалтаа аажмаар сулруулж эхэллээ. Тус улс эхний ээлжинд Шинэ Зеландаас ирж байгаа вакцины хоёр тунд хамрагдсан жуулчдыг хүлээн авч байна.

Австралийг зорих жуулчид коронавирус илрүүлэх шинжилгээнд хамрагдаад “сөрөг” гарсан тохиолдолд тус улс руу нэвтрэх эрхтэй болж байна. Харин Австрали улсад зорчиж болох дараагийн ээлжийн жуулчид нь Сингапурын жуулчид болно.

Тус улс Сингапураас жуулчид хүлээж авахдаа Шинэ Зеландын иргэдэд тавьсантай ижил шалгуур тавих юм. Австралийн Ерөнхий сайд Скотт Моррисон өнгөрсөн ням гарагт Италид болсон "Их хорь"-ийн бүлгийн дээд хэмжээний уулзалтын үеэр Сингапурын Ерөнхий сайд Ли Сиен Лунтай уулзсанаар уг шийдвэрийг гаргажээ.

Гэхдээ аялагчид Австралийн хамгийн олон хүн амтай хоёр муж болох Шинэ Өмнөд Уэльс болон Виктория мужид 11 дүгээр сарын 21-нээс эхлэн зорчих юм.

Австрали улс цар тахлаас сэргийлж хамгийн удаан хөл хорио тогтоосон улс болсон юм. Харин Сингапур өнгөрсөн долоо хоногт АНУ, Их Британи зэрэг 12 улсаас гадна Австралиас ирсэн вакцинтай жуулчдыг тусгаарлалтын дэглэмгүй аялах иргэдийн жагсаалтад оруулсан юм.