Японы рагбигийн шигшээ багийн ахлагч Майкл Лийтч монголчууд рагбид сүмогоос дутахгүй амжилт гаргана гэж үзсэний үндсэн дээр Монгол Улсаас рагбигийн “Ёкозүна” төрүүлэх хүсэлтэй байгаагаа өнгөрсөн онд Монголын рагбигийн холбоонд ирүүлж байсан билээ.

Майкл Лийтчийн аав нь Шинэ Зеланд, ээж нь Фижи хүн бөгөөд 15 настайдаа Япон улсыг зорин Саппоро хотын Яманотэ ахлах сургуулийг төгссөн нь түүний амьдралд маш том өөрчлөлтийг авч ирсэн гэдэг. Тодруулбал, рагбигийн спорт түүнд хүндлэл, ёс зүй, багийн ажиллагаа, тэсвэр тэвчээр, хариуцлага хүлээх чадвар, манлайлал зэрэг олон зүйл сургаснаас гадна Майклыг амжилтад хөтөлсөн юм. Тэрбээр дээрх боломжийг 15-16 настай монгол хүүд олгохыг зорьжээ. Учир Япон улсад монгол сумочдын гаргаж буй бахдам амжилтууд түүнд нөлөөлсөн аж.

Ийн түүний Монголын рагбигийн холбоотой хамтран явуулсан Япон улсад гурван жилийн хугацаатай 100 хувийн тэтгэлгээр суралцах тамирчинг сонгох шалгаруулалтад Буянт-Ухаа цогцолборын сурагч Д.Норовсамбуу тэнцсэн байна.

Майкл Лийтч Д.Норовсамбууд ирэх есдүгээр сарын 20-ноос арваннэгдүгээр сарын 2-ныг хүртэл Япон улсад зохиогдох Рагбигийн дэлхийн аварга шалгаруулах тэмцээнийг үзүүлэхээс гадна суралцах сургуулийг нь танилцуулах аж. Д.Норовсамбуу Японд суралцах үедээ долоо хоногийн зургаан өдөр рагбигаар хичээллэх бөгөөд цаашид амжилтаа ахиулвал мэргэжлийн клубтэй гэрээ байгуулах боломж нээгдэнэ.

---

	Д.Норовсамбуу 100 хувийн тэтгэлгээр Японд гурван жил сурна
Үзсэн: 981	Mongolian National Broadcaster